شعر خاص عن العندليب الاسمر

ضاع النغم مـ الوتر

والوش جننى

والفن حاله إتعوج

وأنا لسة مستنى

تعالى عيد فننا

يا عندليب غنى

يا مسك أهل النغم

يا كف متحنى

هاجرت طيور الغنا

ما أعرفشى راحت فين

كل الأصيل اغترب

وتاهت العناوين

كل اللى فاضل نشاز

قاعد على الصفين

زى الردئ الهزيل

عايم على الميه

أما الأصيل فى النغم

بيدفنوه فى الطين

يا عندليب فننا

شوف الطرب مالُهْ

دا حاله أصبح عدم

تعالى شوف حاله

بقى النغم درَبُكهْ

فى كل أحوالُه

والكل غاوى غُنا

فرحان بمواله

والحظ لو يخدمه

يبقى النقيب خالُه

تمشى الأمور والسكك

تِسلك وتحلى له

يا عندليب النغم

سيرتك خلود فـ خلود

فنك برغم السفر

فوق الجميع موجود

والغصن مهما دبل

يفضل عبيره يجود

والتوبة فيها الشفا

زى الهوى وموعود

الفن فين يا حليم ..؟

عمر اللى راح ميعود ؟!
_______
نشرت فى مجلة اتصالات المستقبل
باب إبداع _ عدد يوليه 2009

شعر رائع جدا اخى شريف فلك جزيل الشكر